الله يرحمك يا ست أمينة

من طرف nana algamda الأربعاء سبتمبر 16, 2009 8:57 pm

السلام عليكم ، الي مش فاهم مين أمينة دي الي في العنوان، هي زوجة الشخصية الشهيرة سي السيد، المهم:

أجرى معهد ستي وستك وست السيد ،المعهد العالمي النووي المهتم بشئون المرأة في الوطن العربي، دراسة شاملة عن أحوال المرأة في ال80 عام الأخيرة، والكام عام الجايين دول، وأشارت الدراسة إلى الآتي :

سنه 1930

الأب : الضيف إلي جالي ده كان جاي يخطبك ، واتفقت معاه الخطوبة يوم الخميس الجاي.

البنت : الي تشوفه يا والدي .

سنه 1950

الأم : فرحك تالت يوم العيد ان شاء الله يا معتمدة

البنت : كل سنة وانتي طيبة يا ماما

سنه 1960

الأب : الواد محمود الأهبل ابن أم محمود جه هو وأمه كلموني عليكي ، هو واد أحول ودمه تقيل زي أمه بس فلوسه دمها زي العسل، الفرح الشهر الجاي يا بنتي ان شاء الله

البنت : سكوووووووت ووجه مملوء بالخجل (^_^) والفرحة

سنه 1970

الأب : الواد عليش علوش معاليش عايز يخطبك موافقة ولا ايه ؟؟

البنت :لأ أنا لسه صغيرة

سنه 1980
الأب: الواد حلوش حليش محاليش اتقدملك وقاعد بره أهوه أقوله ايه ؟

البنت : وماسألتوش شغال ايه ولا بياخد كام ؟!!

سنه 1990
الأب: في واحد بره كده مش عارف اسمه بيقول انه جاي يخطبك

البنت : طيب يا بابا أنا لازم أقعد معاه وأتعرف عليه مش ده هيبقى شريك حياتي والمستقبل والدنيا الجاية وحاجات كدة.

سنه 2000

البنت : بابا ، زميلي في الجامعه جاي يخطبني النهاردة ،أحمد زي العسل والله وأمور ودمه خفيف وافق بأه يا بابا وافق وافق وافق

سنه 2010

الشاب : السلام عليكم ، ياعمي أنا طالب إيد بنتك

البنت : على بركة الله ، نقرا الفاتحة.

سنه 2015

البنت : بابا انا خطوبتي النهاردة على 8 كدة، هبقى أرنلك.

الاب : كويس انك عرفتيني والله دانا كنت مسافر بس خلاص قاعد ، هو انا عندي اعز منك يا قمر انتي ، ان ماكنتش احضر خطوبة بنتي أحضر خطوبة مين .

سنه 2020

البنت : بابا بابا باركلي ، انا حددت انا وحازم معاد الفرح الأسبوع الجاي،هو قالي انه لا عايز خطوبة ولا بتاع احنا لسه هنتعرف على بعض أكتر من كده ، ماتنساش بأه تكلم العيلة وكده بس ما تزودش عن 20 ،ماشي؟ سلام يا بابا

سنه 2030
البنت : سلم على جدو يا حبيبي ،

الأب : جدو مين؟؟ مين ده ؟

البنت : ده فادي ابني يا بابا سميته على اسمك ،هو انا ليا أعز منك في الدنيا دي كلها يا بابا يا حبيبي.

يارب تعجبكم
نانا الجامدا